Олон жилийн турш иргэд, олон нийтийн анхаарлын төвд байж, өөрчлөлт, шинэчлэлтийн хүлээлт үүсгээд байсан хэсэг буюу Зуунмод сумын Номт 1 дүгээр багт байх ашиглалтын шаардлага хангахгүй болсон 1 болон 2 дугаар байрны дахин төлөвлөлтийн төслийг өнөөдөр эхлүүллээ.
Энд Улаанбаатар хотод баригддаг бизнес зэрэглэлийн орон сууцнууд сүндэрлэн босно.
Ингэснээр иргэдийн орон байрны хэрэгцээг хангаад зогсохгүй орчин үеийн хэв маягийг бүрдүүлж, хот төлөвлөлтийн шинэ жишиг тогтох тухай төслийн хэрэгжүүлэгчид онцолж байв.
Тус барилга нь 6000м2 талбайг хамрах ба 300 айлын багтаамжтай ба сүүлийн үеийн байгальд ээлтэй ногоон технологиор баригдах юм. Гүйцэтгэгчээр 14 жилийн туршлагатай барилга угсралтын “Гурван эрдэнэ” ХХК-ийн хамт олон ажиллана.
Төслийн нээлт, шав тавих ёслолын ажиллагаанд Аймгийн ИТХ-ын дарга Н.Энхболд, Засаг дарга Л.Төмөрчөдөр, сумын удирдлагууд, гүйцэтгэгч компаниудын удирдлага, хамт олон, иргэдийн төлөөлөл оролцлоо.
Аймгийн ИТХ-ын дарга Н.Энхболд: "Бид иргэд, олон түмний эрх ашгийг нэн тэргүүнд тавьж, барилга баригдахаас дуусах хүртэл хугацаанд хамтын оролцоотой байж, гүйцэтгэгчдийг дэмжиж, хяналт тавьж ажиллана. 100 гаруй жилийн түүхтэй аймагт маань анхны дахин төлөвлөлтийн томоохон ажил өрнөж эхэллээ. Үүнийг бид шинэ өнгө төрхтэй, “Шинэ Зуунмод” хотын эхлэл гэж харж байна. Уг орон сууцны барилга нь өөрөө сэргээгдэх эрчим хүчээр хангагдсан, зэс хоолой суурилуулагдаж байгаагаараа онцлогтой юм".
Аймгийн Засаг дарга Л.Төмөрчөдөр: "Монгол Улсын Засгийн газар хувийн хэвшлээ дэмжиж ажиллах чиглэл баримталж байгаа. Бид ч мөн орон нутгийн түвшиндээ хувийн хэвшлийн байгууллагуудыг дэмжин ажиллана. Төв аймаг 2025 оныг “Бизнесийн хөгжлийг дэмжих” урианы жил болгон зарласан. Урианы жил, баримталж буй бодлого маань нэг зүгт чиглэж байгаа. Үүний нэгэн илэрхийлэл болж олон жил уягдсан дахин төлөвлөлтийн анхны суурь өнөөдөр тавигдаж байна. Уг 300 айлын орон сууцны барилгын гүйцэтгэгч компанитай бид өнгөрсөн цаг хугацаанд байнга холбоотой байсаар ирсэн. Төв аймгийн иргэд тохилог, таатай орчинд амьдрах, цаашлаад ажилтай, орлоготой байх нь бидний зорилго юм. Барилга баригдах явцад төрийн зүгээс бүх шатанд дэмжиж, чанартай барилгыг цаг хугацаанд нь ашиглалтад ороход хамтарч ажиллахаа илэрхийлье. Иргэдийн эрх ашиг хамгийн түрүүнд явах ёстой.
Иргэд та бүхний дэмжлэгтэй барилгын ажил чирэгдэлгүй өрнөх байх гэсэн итгэл дүүрэн байна. Энэхүү барилгад зэс хоолой тавигдаж байгаа. Мөн металл хийцлэлийг шингээж, цонхыг 3 давхар вакум шилээр, тагтыг хар өнгөтэй хатаасан шилээр хийж байгаа нь шинэ өнгө төрх, стандартыг бий болгож байна. Барилга баригдахтай холбогдуулан ажиллах хүчний асуудал яригдана. Сум, багийн дарга нар хүний нөөцөөр хангах ажлыг зохион байгуулна."
Зуунмод сумын Засаг дарга бөгөөд хотын захирагч Б.Хатанбаатар: "Зуунмод сум маань 80 гаруй жилийн түүхтэй, дахин төлөвлөлтөд оруулах зайлшгүй шаардлагатай хэд хэдэн байршил бий. Бид 2012 онд “1000 айл”-ын орон сууцны хороололтой болох суурийг тавьж байсан бол өнөөдөр 1000 айлын орон сууц маань баригдаад дууссан. Үргэлжлүүлэн 2000 айлын орон сууцны барилгын ажил явагдаж байна. Сумын дахин төлөвлөлтийн ажил энэ онд эхэлж байгаад баяртай байна. Өнөөдөр энд шаваа тавьж байгаа орон сууцанд хэн орох вэ гэсэн асуулт та бүхэнд байгаа байх. Энд “Орлоготой иргэн” л орно. Бид сумынхаа иргэдийг Ажилтай - Орлоготой болгоход, Ажилтай - Орлоготой байлгахад анхаарч ажиллана. Аймаг, сумын хөгжлийн бодлого ч үүнд чиглэж байгаа. Эцэст нь бид барилгын гүйцэтгэгч компанийг бүх талаар дэмжиж, хамтарч ажиллана."
“Гурван эрдэнэ” ХХК-ийн захирал н.Отгонжаргал: "Манай компани 2011 онд байгуулагдсан. Өдгөө 14 жилийн түүхээ бүтээж явна. Бид барилгын салбарын олон бүтээн байгуулалтад гар бие оролцож, гүйцэтгэгчээс захиалагч болтлоо ажилласан туршлагатай хамт олон. Улаанбаатар хотод баригддаг бизнес зэрэглэлийн барилгыг Зуунмод суманд нутагшуулъя гэсэн зорилгоо эрхэм болгож, төрийн байгууллагын бүх шатны удирдлагууд та бүхнийхээ дэмжлэг туслалцаатай барилгын ажлаа чанарын өндөр түвшинд гүйцэтгэж, хугацаанд нь ашиглалтад хүлээлгэн өгөх болно. Зуу, зуун жилд дуурсагдах их бүтээн байгуулалтыг хамтдаа бүтээцгээе" гэж ёслолд оролцсон удирдлагууд хэлж байлаа.
