МУ-ын Шадар сайд, УОК-ын дарга С.Амарсайхан цаг үеийн нөхцөл байдалтай холбогдуулан 21 аймаг, нийслэлийн Онцгой комиссын дарга нартай цахимаар  өнөөдөр (2025.03.25) хуралдлаа.

Цахим хуралд Төв аймгийн Онцгой комиссын дарга, дэд дарга, гишүүд оролцов.

Ой хээрийн түймэр, шар усны үерээс урьдчилан сэргийлэх төлөвлөгөө, арга хэмжээний талаар хэлэлцэн дараах үүрэг чиглэлийг өглөө.

1. Улсын хэмжээнд хуурайшилт их байгаа тул ой, хээрийн түймрээс урьдчилан сэргийлэх, эрсдэлийг бууруулах, гамшгаас хамгаалах алба, мэргэжлийн анги, сайн дурын бүлэг, нөхөрлөлийн бэлэн байдлыг хангах, чадавхжуулахад орон нутгийн удирдлага, мэргэжлийн байгууллагаас анхаарч ажиллах, түймрийн эзэн холбогдогчийг олж тогтоох, хуулийн хариуцлага тооцох,

2. Цаг агаарын аюултай болон гамшигт үзэгдлээс урьдчилан сэргийлэх, эрсдэлийг бууруулах, хариу арга хэмжээг шуурхай зохион байгуулж хохирол багатай даван туулах, иргэдэд сэрэмжлүүлэг мэдээллийг шуурхай хүргэх,

3. Гамшигтай тэмцэх үйл ажиллагаанд дэвшилтэт техник, технологийг нэвтрүүлж, чадавхжуулах ажлыг эрчимжүүлэх, орон нутаг дэмжлэг үзүүлж ажиллах,

4. Гамшгаас хамгаалах төлөвлөгөөг орон нутгийн онцлогт тохируулан шинэчлэхийг үүрэг болголоо.