Монгол Улсын Засгийн газраас тариалангийн тогтвортой хөгжлийг хангах, газар тариаланг мал аж ахуйтай хослуулан, эрчимжүүлж, төрөлжүүлэн хөгжүүлэх замаар хөнгөн, хүнсний үйлдвэрүүдээ шинэ шатанд гаргах зорилгоор “Атрын IV аян”-ыг зарласан билээ.
Тэгвэл Төв аймгийн хэмжээнд “Атрын IV” аяныг Архуст сумаас эхлүүлж, өнөөдөр тариаланчдын зөвлөгөөнөө хийлээ. Зөвлөгөөнд аймгийн ИТХ-ын дарга Н.Энхболд, Засаг даргын орлогч Б.Батбаатар нар оролцож аймаг, орон нутгаас тариалангийн талаар баримталж байгаа бодлого, шийдвэр, хөрөнгө оруулалт, үйл ажиллагааны талаар мэдээлэл өгөв. Мөн Монгол Улсын Төрийн соёрхолт, гавьяат агрономичидоос бүрдсэн зөвлөх баг, аймгийн ХХААГ-ын газар тариалангийн салбар хариуцсан удирдлага, мэргэжилтнүүд, сумын удирдлагууд, тариаланчид оролцлоо.
Архуст сум нь Монгол Улсын Засгийн газрын 2018 оны “Газар тариалангийн зарим бүс нутгийг тогтоох тухай” 131 дүгээр тогтоолын дагуу газар тариалангийн бүс нутагт шинэчлэгдэн баталгаажсан байдаг. Газар тариалангийн нийт 23 мянган га эргэлтийн талбайтай бөгөөд жилдээ 14,0-16,0 мянган га талбайг эргэлтэд оруулж байна. 26 аж ахуйн нэгж, 212 иргэн газар тариалангийн үйлдвэрлэл эрхэлж байна. Тус сумын тариаланчид сүүлийн гурван жил таримал тэжээлийн ургацаараа аймагтаа тэргүүлсэн бол Төв аймагчууд улсдаа тэргүүлсэн амжилтыг үзүүлээд байгаа юм. Архустын “Шар манжин” нутгийн брэнд болтлоо алдаршсан билээ. Энэ бүх амжилтууд тус сумын ажилч хичээнгүй, хөдөлмөрч тариаланчдын уйгагүй зүтгэлийн үр дүн юм.
Түүнчлэн Архуст суманд 143 малчин өрх, мал бүхий 172 өрх, мал аж ахуйн салбарт хамааралтай 315 өрх амьдарч байна. 1 аж ахуйн нэгж, 18 өрх эрчимжсэн мал аж ахуй эрхэлж байгаа бол 13 өрх, 1 фермер сүүний чиглэлийн үхэр үржүүлж байна. 5 өрх махны чиглэлийн үхэр үржүүлж байгаа бөгөөд үхэр сүргийн тоо толгой 44-т хүрчээ.
Монгол Улсын Засгийн газраас газар тариалангийн тогтвортой хөгжлийг хангах хүрээнд хэд хэдэн томоохон зорилтыг дэвшүүлсний нэг нь эрчимжсэн мал ахуйн суурь ТЭЖЭЭЛИЙН ТАРИАЛАЛТЫГ нэмэгдүүлэхэд чиглэж байгаа нь Архуст сумын газар тариалангийн бодлого, зорилттой уялдаж байгааг сумын Засаг дарга Э.Энхтөмөр нээлтийн үеэр хэлсэн үгэндээ онцолсон.
2025 онд Архуст сум 15,0 мянган га талбайд тариалалт хийнэ. Үүнээс үр тариа 4800 га, хүнсний ногоо 1000 га, шар манжин, тосны ургамал 2500 га, ногоон тэжээл 7000 га талбайд тариалахаар төлөвлөсөн байна.
