УИХ-ын Тамгын газар,Швейцарын хөгжлийн агентлагийн хамтран хэрэгжүүлж буй “Монгол Улсад Парламентын ардчиллыг бэхжүүлэх нь” төслийн хүрээнд “Бодлогод залуусын хяналт” ТББ-тай хамтран зохион байгуулж буй “Парламентын ардчиллыг бэхжүүлэхэд сэтгүүлчдийн оролцоо” хөтөлбөрийн үндсэн сургалт амралтын өдөр ( 2023.06.25) Хууль зүйн үндэсний хүрээлэнд зохион байгуулагдлаа.
Уг хөтөлбөрт залуу сэтгүүлчид болон иргэний нийгмийн байгууллагын төлөөлөл оролцож байгаа бөгөөд УИХ-ын хяналт шалгалтын тухай хуулийг хэрэгжүүлэх процессын талаарх ойлголтоо нэгтгэж, холбогдох мэдээлэлтэй танилцахын зэрэгцээгээр багт хуваагдан видео контент бэлтгэн онол, практикийг хослуулан ажиллалаа.
Үндсэн сургалт УИХ-ын хяналт шалгалтын эрх зүйн зохицуулалт, УИХ-ын хяналт шалгалтын хэлбэрүүд, УИХ-ын хяналт шалгалтын тухай хуулийг таниулах арга зүй, Сэтгүүл зүйн бүтээл туурвихад анхаарах зүйл зэрэг сэдвүүдийн хүрээнд өрнөж, хэлэлцүүлэг өрнүүлэв.
Энэ хүрээнд УИХ-ын Тамгын газрын дэд дарга Ц.Батбаатар “УИХ-ын хяналт шалгалтын үйл ажиллагаа, зохион байгуулалт” сэдвээр танилцуулга, мэдээлэл хийлээ.
УИХ-ын Тамгын газрын дэд дарга Ц.Батбаатар танилцуулгадаа хууль тогтоомжийн хэрэгжилтэд хяналт, шинжилгээ хийхэд тулгарч буй асуудал, гарц шийдлийн талаар онцлон дурдав.
Үргэлжлүүлэн УИХ-ын Тамгын газрын Хяналт шалгалт, үнэлгээний газрын Хяналт шалгалтын хэлтсийн дарга Ж.Лхагвасүрэн “Хяналт шалгалтын процесст иргэний нийгэм, сэтгүүлчид оролцох боломж” -ийн талаар, Төсвийн хяналт шинжилгээний хэлтсийн дарга Д.Эрдэнэсамбуу “Хяналтын сонсгол”-ын талаар танилцуулав.
Хяналтын сонсгол зохион байгуулах эрх зүйн зохицуулалт, хяналтын сонсголын төрлүүд болон Улсын Их Хурлаас зохион байгуулсан хяналтын сонсгол, тэдгээрийн үр дүнгийн талаар танилцуулж, илтгэгч тус бүрийн дараа оролцогчид сонирхсон асуултдаа хариулт авлаа.
Мөн Томилгооны сонсголын талаар УИХ-ын тамгын газрын тэргүүн дэд дарга М.Үнэнбат, Улсын Их Хурлаас хууль тогтоомжийн хэрэгжилтийн үр дагаварт үнэлгээ хийх үйл ажиллагаа сэдвээр Парламентын номын сангийн дарга С.Янжинхорлоо, оролцогчдод танилцуулга мэдээлэл хийв.
Сургалтын төгсгөлд оролцогчид багийн бүтээлээ Менторуудад танилцуулж, зөвлөгөө мэдээлэл авлаа гэж УИХ-ын Хэвлэл мэдээлэл, олон нийттэй харилцах газраас мэдээлэв.
