“Алсын хараа-2050” Монгол Улсын урт хугацааны хөгжлийн бодлогын баримт бичгийн 1.2 дахь зорилтод “Үндэсний оюун санаа, өв соёл, сэтгэлгээнд тулгуурласан бүтээгч монгол хүн төвтэй нүүдлийн соёл иргэншлийг хадгалсан тэргүүлэх улс болно.” хэмээн тодорхойлж, Засгийн газрын 2020-2024 оны үйл ажиллагааны хөтөлбөрийн 2.6.2.2 дахь хэсэгт тусгасны дагуу иргэдэд соёлын боловсрол олгох үндэсний сургагч багш нарыг “Бүх нийтийн соёлын боловсрол” арга хэмжээний хүрээнд улсын хэмжээнд бэлтгэж эхэлсэн.
Монгол орны байгаль цаг уур, газар нутгийн онцлогтой уялдан бий болсон, Монголын ард түмний уламжлалт сэтгэлгээ, ахуй амьдрал, шүтлэг бишрэл, зан заншил, мэдлэг, арга ухааны илэрхийлэл болсон соёлын биет бус өвийн оршин тогтнох чадварыг бэхжүүлэх, хамгаалахад оролцогч талууд чухал хувь нэмэртэй билээ. Соёлын биет бус өвийг хамгаалахад оролцогч талуудын мэдлэг, ойлголтыг сайжруулах, нэмэгдүүлэх нэн шаардлагатай болсон энэ цаг үед ЮНЕСКО-ийн Ази, Номхон далайн бүсийн Соёлын биет бус өвийн олон улсын сургалтын төв (CRIHAP)-с “Монгол Улсын соёлын биет бус өвийг хамгаалах чадавхыг бэхжүүлэх, сургагч багш бэлтгэх” 3 жилийн төслийг Соёлын яамтай хамтран хэрэгжүүлэхээр болоод байна.
Тус сургалтыг “Бүх нийтийн соёлын боловсрол” арга хэмжээний үргэлжлэл болгон зохион байгуулж буй бөгөөд 2022 онд цувралаар зохион байгуулагдсан “Соёлын боловсролын үндэсний сургагч багш бэлтгэх сургалт”-д музей, номын сан, судалгааны хүрээлэнгээс хамрагдсан 20 сургагч багш, мөн 21 аймгийн Соёл, урлагийн газарт соёлын өвийн асуудал хариуцан ажиллаж буй 21 мэргэжилтэн, нийт 41 мэргэжилтнийг хамруулж байна. Сургалтаар Соёлын биет бус өвийг хамгаалах тухай 2003 оны конвенцын үндсэн зарчим, суурь ойлголт, хамгаалалтын механизмын талаарх ойлголт, мэдлэгийг өгөх, цаашлаад соёлын биет бус өвийн оршин тогтнох чадварыг салбар хоорондын харилцан хамаарал, тогтвортой хөгжлийн баримт бичиг, бодлоготой уялдуулан судлах цогц чадамжийг оролцогчдод өгнө.
“Соёлын биет бус өвийг хамгаалах тухай” бие даасан хуулийн төслийг Монгол Улсын Их Хуралд өргөн барихаар ажиллаж буй энэ цаг мөчид энэхүү сургалтыг зохион байгуулж буй нь хуулийн хэрэгжилтийг хангаж ажиллах боловсон хүчний мэдлэг, ойлголтыг нэмэгдүүлэх, цаашлаад соёлын биет бус өвийг хамгаалахад оролцогч талуудын үүрэг, оролцоог нэмэгдүүлэхэд чухал ач холбогдолтой юм гэж Соёлын яамнаас мэдээллээ.
