УИХ дахь Байгаль хамгаалах бүлэг Олон улсын байгаль хамгаалах нийгэмлэгтэй хамтран ажиллах санамж бичиг байгуулсан.  УИХ дахь энэхүү бүлэг байгуулагдснаасаа хойшхи хоёр жилийн хугацаанд тус нийгэмлэг, “Рио тинто Монгол” ХХК болон Байгаль орчин, аялал жуулчлалын яам, Засгийн газрын хэрэгжүүлэгч агентлаг Ойн газартай хамтран  “Эрүүл ой” хэмээх төслийг хэрэгжүүлж байна.

Энэ сарын 04-ний өдөр тус төслийн үр дүнг хэлэлцэх уулзалт боллоо. Монгол орны газар нутгийн ердөө 7,9 хувь нь ойгоор бүрхэгдсэн бөгөөд 2022 оны байдлаар 737.000 га газар хөнөөлт шавжид өртсөн гэсэн судалгаа гарчээ. Нэн даруй ойн шавжтай тэмцэх ажлыг эрчимжүүлэх шаардлагатай учраас “Рио тинто Монгол” компанийн 7,4 тэрбум төгрөгийн санхүүжилтээр авиа микробиологийн аргаар 150 мянган га талбайд 5 аймгийн 16 сум, Улаанбаатар хотын ногоон бүс болох Богдхан уулын дархан цаазат газар,  Горхи-Тэрэлжийн ойн санд хөнөөлт шавжтай тэмцэх ажлыг хэрэгжүүлжээ.

Мөн энэхүү төслийг хэрэгжүүлснээр ойн хамгааллын салбарт олон улсын туршлагыг нэвтрүүлэх, мэргэжилтнүүдийн чадавхыг бэхжүүлж, ур чадварыг дээшлүүлэх, шинэ боловсон хүчнийг бэлтгэх зэрэгт ахиц гарсан гэж үзжээ. Төсөл хэрэгжих хугацаанд 300 000 га талбайд тэмцлийн ажлыг хийх бөгөөд 120 ширхэг Итали улсын үүрэн шүршигч болон 400 ширхэг фермонт урхи зэргийг Ойн газарт өгөх юм.

Уулзалтад УИХ-ын гишүүн, УИХ дахь Байгаль хамгаалах бүлгийн дарга  Ц.Цэрэнпунцаг,  УИХ-ын гишүүн Ч.Ундрам болон Олон улсын байгаль хамгаалах нийгэмлэгийн захирал Тодд Койнингс, “Рио тинто Монгол” ХХК-ийн гүйцэтгэх захирал Х.Амаржаргал  болон төсөл хамтран хэрэгжүүлэгч  яам, агентлагийн  мэргэжилтнүүд оролцлоо гэж УИХ-ын Хэвлэл мэдээлэл, олон нийттэй харилцах газраас мэдээллээ.