УИХ-ын дарга Г.Занданшатар, Батлан хамгаалахын сайд Г.Сайханбаяр, ОБЕГ-ын дарга, хошууч генерал Г.Ариунбуян нар Архангай аймгийн Булган суманд оторлож байгаа малчин өрхүүдийн төлөөлөлтэй уулзаж, өвөлжилтийн нөхцөл байдал, цаг үеийн хүндрэл бэрхшээлийн талаар мэдээлэл сонслоо.

Тус аймгийн нутгаар Баянхонгор, Завхан, Хөвсгөл аймгаас малчид ирж өвөлжихөөс гадна аймаг дотроо ч отор нүүдэл хийх нь их байна. Аймгийн 8 суманд зудын байдалтай гэж үнэлэгджээ.

Энэ үеэр Баянхонгор аймгийн Эрдэнэцогт сумаас отор нүүдэл хийж байгаа залуу малчин А.Дорждагвынд зочиллоо. Залуу малчин гэр бүл ган, зуд, байгаль цаг уурын бэрхшээлээс илүү малын гаралтай түүхийн эдийн үнэгүйдэл малчдын аж амьдралд хамгийн том чөдөр тушаа болж байгааг онцолсон юм.

Тэд уламжлалт нүүдлийн мал аж ахуй олон талын өгөөжтэй ч ашиг шимийг нь бүрэн дүүрэн хүртэж чадахгүй учраас нэгдмэл зохион байгуулалт, тогтолцооны өөрчлөлт хэрэгтэй гэдэг саналыг хэлж байлаа.

Архангай аймаг нь 2019 оноос эхлэн малчдын нөхөрлөлийг байгуулж, хамтарч эхэлсэн туршлагатай. Иймд бэлчээрийн мал аж ахуйн уламжлалт өв соёлыг алдагдуулахгүйгээр МАЛЧИН-МАЛ-БЭЛЧЭЭР гурвын харилцан шүтэлцээг хангах замаар малчин өрхүүдийн хөдөлмөрөөрөө хорших, нэгдэн хамтрах үйл ажиллагааг дэмжих нь чухал байна.

Отрын бүсэд өвөлжиж байгаа малчин өрхүүдэд өвс тэжээлийн хангамж, эрүүл мэндийн үйлчилгээ зэрэг тулгамдаж байгаа бэрхшээлүүдийг шийдвэрлэхээр ОБЕГ болон аймаг, орон нутгийн удирдлагууд холбогдох арга хэмжээг авч ажиллаж байгаа юм.