Барилга, хот байгуулалтын сайд Ц.Даваасүрэн Финландын Гадаад харилцааны яамны Гадаад эдийн засгийн хамтын ажиллагаа хариуцсан Төрийн нарийн бичгийн дарга /Дэд сайд/ Ярно Сиряалатай уулзав.
Бүгд Найрамдах Финланд Улсад ажлын айлчлал хийх үеэрээ сайд Ц.Даваасүрэн Монгол Улсын эрчим хүчний оргил ачааллын үеийн хэрэглээг газын станцаар болон сэргээгдэх эрчим хүчээр шийдвэрлэх талаар тус улсын Гадаад харилцааны яамны Эдийн засгийн хамтын ажиллагааны Төрийн нарийн бичгийн даргатай санал солилцсон байна.
Мөн хоёр орны хамтын ажиллагааг барилга, хот байгуулалтын чиглэлээр өргөжүүлэн хөгжүүлэх талаар ярилцсан бөгөөд Финланд Улсын хувьд дээрх салбар чиглэлүүдийн хүрээнд хамтран ажиллахад бэлэн гэдгээ илэрхийлжээ.
Барилга, хот байгуулалтын сайд мөн “Wärtsilä Energy” компанийн төлөөлөлтэй уулзалт хийсэн байна.
Энэ үеэр Бизнесийн хөгжлийн асуудал хариуцсан захирал Майкл Болл болон, менежер Три Нгуентус компаний байгалийн хий, шингэн түлш, нар, салхи зэрэг сэргээгдэх эрчим хүчний, түлшний эх үүсвэрүүдийг ашиглан уян хатан, үр ашигтай цахилгаан станцын шийдэл танилцуулжээ.
Монгол Улсын Эрчим хүчний яам болон “Wärtsilä Energy” компанийн экспертүүдтэй хамтран 2019 онд хийж гүйцэтгэсэн эрчим хүчний эх үүсвэрүүдийн судалгааг бодит ажил хэрэг болгох чиглэлээр үргэлжлүүлэн ажиллахаа Финландын тал илэрхийлжээ.
Тус компанийн дэвшилтэд технологийг нутагшуулах, уур амьсгалын өөрчлөлтөд тэсвэртэй барилга, дулаан шийдлийг нэвтрүүлэх, санхүүжилт, хөнгөлөлттэй зээл, гадаадын хөрөнгө оруулалтыг татах зэрэг асуудлыг хэлэлцсэн байна.
