"Эрдэнэт үйлдвэр" ТӨҮГ хүдэр баяжуулах үйлдвэрийн өргөтгөлийн нээлт өнөөдөр боллоо.
Баяжуулах үйлдвэрийн ӨНХ-ийн жилд 6 сая тонн хүдэр боловсруулах хүчин чадалтай 4-р шугамыг барьж байгуулж ашиглалтад оруулснаар жилд 40 сая тонн хүдэр боловсруулах юм.
Уурхайн уул-геологийн хүндэрч буй нөхцөл байдлаас шалтгаалан 2017-2022 оны хугацаанд Баяжуулах үйлдвэрийн боловсруулсан хүдэр дэх зэсийн агуулга 0.42-0.36% хүртэл буурч, зэсийн баяжмал гаргалт 604-574 мян.тн болж багассан.
Эцсийн бүтээгдэхүүний гарц буурснаар өртөг зардал өсөж, эдийн засгийн алдагдалд хүрэх эрсдэл дагуулсаар байсан.
Иймд Засгийн газрын 2020-2024 оны үйл ажиллагааны хөтөлбөр, “Эрдэнэт үйлдвэр” ТӨҮГ-ыг 2031 он хүртэл хөгжүүлэх үндсэн чиглэлд дэвшүүлсэн Баяжуулах үйлдвэрийн хүдэр боловсруулах суурилагдсан хүчин чадлыг жилийн 32 сая тн-оос нэмэгдүүлэн 38 сая тн болгох, цаашлаад 40 сая тоннд хүргэж, зэсийн баяжмал гаргалтыг хүрсэн түвшинд нь тогтвортой барих зорилтын хүрээнд Баяжуулах үйлдвэрийн Өөрөө нунтаглах хэсгийн хүчин чадлыг жилд 6 сая тн-оор нэмэгдүүлэх шинэ 4 дүгээр шугамын өргөтгөлийн ажлыг 2020 оны 04 дүгээр сараас 2022 оны 08 дугаар сард гүйцэтгэсэн.
Төсөлд 136.9 сая долларын хөрөнгө оруулалт хийж, 2,5 жил хугацаанд зарцуулах төсвөө нөхнө гэж үзэж байна 2020-2022 онд дэлхий нийтийг хамарсан коронавирусын цар тахлын нөхцөл байдлаас шалтгаалан бүтээн байгуулалтад шаардлагатай тоног төхөөрөмж, сэлбэг хэрэгсэл, бараа материалын үйлдвэрлэл удааширч, хилээр нэвтрүүлэх ачаа тээвэр саатаж байсан үед Монгол улсын Засгийн газар, төр захиргааны байгууллагууд, “Эрдэнэт үйлдвэр” ТӨҮГ-ын удирдлагууд болон гүйцэтгэгч компаниудтай хамтран шуурхай арга хэмжээ авч ажилласны үр дүнд бүтээн байгуулалтыг хугацаанд нь ашиглалтанд оруулж байсан. Үүний үр дүнд 2022 оны 08 дугаар сарын 22-ны өдөр залгаж, туршилт тохируулгын ажлыг гүйцэтгэж, улсын комисст 2022 оны 08 дугаар сарын 30-ны өдөр тус тус акт үйлдэн хүлээлгэн өгсөн. Тус өргөтгөлийг ашиглалтад оруулснаас хойш 2023 оны 09 дугаар сарын 26-ны өдөр буюу 1 жилийн хугацаанд 6 сая хүдрийг боловсруулж, 175 сая долларын бүтээгдэхүүн үйлдвэрлэж, төслийн хүчин чадлыг бүрэн эзэмшсэн.
Түүнчлэн ашиглалтад орсноос хойш 2 жил хүрэхгүй хугацаанд буюу 2024 оны 08 дугаар сарын 20-ныг хүртэл 11.4 сая тн хүдэр боловсруулж, 337.9 сая долларын бүтээгдэхүүн үйлдвэрлэсэн нь борлуулалтын орлогоороо хөрөнгө оруулалтаа бүрэн нөхөж чадсан үр ашигтай төсөл болсныг харуулж байна. Энэ удаад тоног төхөөрөмжийг ашиглалтанд хүлээж авааад нээлт хийхээсээ илүүтэйгээр төслийн ажлыг 2 жилийн хугацаанд ажиллуулж, найдварт ажиллагааг нь баталгаажуулж, технологийг нутагшуулж, төслийн хүчин чадалд нь хүргэж, борлуулалтын орлогоороо хөрөнгө оруулалтаа 2 дахин нөхөж чадсан цаг үед өнөөдөр төслийг хүлээн авах ёслолыг үйлдэж байна. “Эрдэнэт үйлдвэр” ТӨҮГ-ыг 2031 он хүртэл хөгжүүлэх үндсэн чиглэлд заасаны дагуу энэхүү Өөрөө нунтаглах хэсгийн 4 дүгээр шугамын хүчин чадлыг 2 сая тн-оор нэмэгдүүлэн, 40 сая тн-д хүргэх төслийг амжилттай хэрэгжүүлж, энэ оны 8 дугаар сараас туршилт тохируулга хийн, ажиллуулж байна.
Мөн 1978 оноос ажиллаж байгаа хүдэр бэлтгэлийн 1 дүгээр шугамыг шинэчлэх, хаягдал өтгөрүүлэх технологи нэвтрүүлэх зэрэг төслүүдийг хэрэгжүүлж байна. Энэхүү Баяжуулах үйлдвэрийн бүтээн байгуулалтын ажлууд нь ирээдүйд боловсруулагдах хүдрийн шинж чанарт тохирсон олон хувилбарт уян схемтэй, аж үйлдвэрийн 4 дүгээр хувьсгалын ололт амжилтуудаас эрдэс боловсруулалтын салбарт нэвтэрч буй орчин үеийн дэвшилтэт технологийг шингээсэн, найдварт ажиллагааны зэрэглэл өндөртэй, ХАБЭА-г бүрэн хангасан дэвшилтэт тоног төхөөрөмжүүдээр тоноглогдож, хамгийн бага зардлаар, өндөр бүтээмжтэй ажиллах зарчимд тулгуурлан үргэлжлэн хийгдэх юм. Ингэснээр өдөрт буурч байгаа хүдрийн агуулга, өдрөөс өдөрт өсөж буй хүдрийн хатуулгын эсрэг ирээдүйд 50-60 гаруй жил ажиллах Эрдэнэт үйлдвэрийг эдийн засгийн өндөр үр ашигтай байлгахын тулд Баяжуулах үйлдвэрийн технологи болон тоног төхөөрөмжийн бэлэн байдлыг хангах аж.
