Сэлэнгэ аймгийн "Алтанбулаг" боомтоор орох чиглэлд хил нэвтэрсэн Монгол Улсын иргэдийн бараа, тээврийн хэрэгсэлд гаалийн хяналт шалгалт хийх явцад их хэмжээний эмийг ундаа, жүүсний тетрапак сав, жигнэмэгийн хайрцаг болон биедээ нууж улсын хилээр хууль бусаар нэвтрүүлэхийг завдсан зөрчил 2024 оны арванхоёрдугаар сард илэрчээ.
Тодруулбал, Сэлэнгэ аймаг дахь гаалийн газрын гаалийн байцаагч нар "Алтанбулаг" боомтод ажил үүргээ гүйцэтгэж байх үедээ “Тоёота” маркийн тээврийн хэрэгсэлд зорчиж явсан Монгол Улсын иргэдийг ачааг шалгажээ.
Тус ачаанд “Gold 100%” ундааны 10, “Чокопай” жигнэмэгийн 6, мөн “Өглөөний хоол”-ны 10 хайрцагт тус тус хийн нуун далдалсан 24 нэр төрлийн эм илэрсэн байна.
Энэхүү гэмт хэргийн шинжтэй зөрчлийг харьяаллын дагуу холбогдох байгууллагад шилжүүлж, шалгалтын ажиллагааг үргэлжлүүлж байна.
Эдгээр эмийн дунд мэдрэлийн өвдөлтийн хам шинж, захын мэдрэлийн өвдөлтийн үед хэрэглэдэг өвчин намдаах үйлчилгээтэй, эмчийн жороор олгодог эм их хэмжээгээр байсан ба энэхүү эмийг тун хэтрүүлэн хэрэглэсэн тохиолдолд мансууруулах үйлчилгээг үзүүлдэг байна.
Эдгээр эмийг мансуурах зорилгоор тун хэтрүүлэн, зориулалтын бус аргаар хэрэглэснээс болж, гар, хөлийн хуруу эд, эрхтэн нь үхжих цаашлаад тайруулах эрсдэл үүсгэдэг аюултай юм.
Иймд иргэдийг улсын хилээр зорчихдоо хувийн хэрэглээнээс хэтэрсэн эм бэлдмэл авч явахгүй байх, дамжуулахгүй, тээвэрлэхгүй байхыг Гаалийн байгууллагаас анхааруулж байна.
