“Цагаан алт” үндэсний хөдөлгөөний хүрээнд Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай, ХХААХҮЯ-ны Хөнгөн үйлдвэрийн бодлогын хэрэгжилтийг зохицуулах газрын дарга М.Дондогдорж, тус газрын ахлах мэргэжилтэн Б.Эрхэмбаяр болон албаны хүмүүс "Их эргэлт" ХХК-ийн үйл ажиллагаатай танилцав.
Тус компани нь 2002 оноос хойш арьс шир, хагас болон бүтэн боловсруулан худалдаалах болон химийн материалын худалдааны чиглэлээр үйл ажиллагаа явуулж байгаа юм.
“Их эргэлт” ХХК нь химийн бодисоор арьс боловсруулах цех буюу нойтон цех, арьс шир гүйцэт боловсруулах буюу хуурай цехэд 40 гаруй хүн ажиллаж байна.
Арьс шир боловсруулалтад ашигласан усыг химийн цэвэрлэгээ хийж дахин ашиглах боломжтой саарал ус болгох /хоногт 200м3 усыг цэвэршүүлэх хүчин чадал бүхий/ байгууламжийг 2022 онд суурьлуулан бүрэн ашиглалтад оруулжээ.
Малчдад арьс, шир зөв хадгалах мэдлэг олгож, соён гэгээрүүлэх нь энэ салбарын үйлдвэрлэгчдэд том дэмжлэг болно хэмээн “Их эргэлт" ХХК-ийн захирал Ш.Отгонсүрэн хэлж байсан юм.
