77 жилийн түүхт Монгол улсын хүнсний ууган үйлдвэр "Мах Импекс" ХК 2023 онд үйлдвэрлэлийнхээ чанар, стандартыг өргөжүүлж, дэлхийн жишигт нийцсэн цоо шинэ үйлдвэрээ ашиглалтад орууллаа.
Нээлтийн үйл ажиллагаанд Хүнс, хөдөө аж ахуй, хөнгөн үйлдвэрийн дэд сайд М.Ганхүлэг, тус яамны Хүнсний үйлдвэрийн бодлогын хэрэгжилтийг зохьцуулах газрын дарга Д.Довчинсүрэн нар оролцон олон улсын чанар стандартад нийцэх НАССР шинэ үйлдвэртэй танилцлаа.
Тус компани Австри улсын BERTSCH-Laska групп компанитай хамтран төсөл хэрэгжүүлж өнөөдөр BERTSCH-Laska компаниас шинэ үйлдвэрийн түлхүүрээ гардан авлаа.
Орчин үеийн тоног төхөөрөмж төдийгүй шинэ жишиг нэвтрүүлсэн уг үйлдвэр нь Ази тивд нээгдсэн өндөр стандартын 4 дэх үйлдвэр болж байна. Тус шинэ үйлдвэр нь хоногт 50 тонн бүтээгдэхүүн буюу бух төрлийн хиам, зайдас, салями, хагас боловсруулсан, утлагат болон хөлдөөсөн бүтээгдэхүүн (банш, бууз, пицца, ази бэлэн хоол гэх мэт) үйлдвэрлэх хүчин чадалтай төдийгүй түүхий утлагат салями, беконыг шарах төхөөрөмжийг Монголд анхлан үйлдвэрлэлдээ нэвтрүүлж байна.
"Мах импекс" ХК BERTSCH-Laska компанитай 150 тэрбум төгрөгийн төсөвт өртөг бүхий хүнсний зориулалтын хөргөлттэй агуулах, мөн 40 тонны багтаамжтай махыг хорогдолгүй гэсгээх, мах ангилан сортлох үйлдвэр барих төслийг хэрэгжүүлэх юм.
УИХ-ын 36 дугаар тогтоолын хүрээнд хэрэгжиж буй эргэлтийн болон хөрөнгө оруулалтын зээлд хамрагдаж, уйл ажиллагаагаа өргөжүүлэх, бүтээгдэхүүний нэр төрлийг нэмэгдүүлэх, дэвшилтэт техник, технологийг үйлдвэрлэлдээ ашиглах, бүтээгдэхүүний чанар, аюулгүй байдалд ихээхэн анхаарч ажилладаг аж ахуйн нэгж юм.
