Тоёотагийн охин компани “Хино Моторс” дизель хөдөлгүүрээс ялгардаг хорт утааны хэмжээг АНУ-ын хяналтын байгууллагад хуурамчаар мэдүүлсэн буруугаа хүлээж 1.3 тэрбум ам.доллар төлөхөөр болжээ.

Ачааны машин үйлдвэрлэгч энэ компанийн АНУ-д дизель хөдөлгүүр нийлүүлэх эрх бас 5 жилээр хасагдана.

Детройтын шүүх “Хино Моторс” компанийг 2010-2022 онд АНУ-д зохих шаардлага хангахгүй 105 мянган хөдөлгүүр нийлүүлсэнд буруутгаснаас асуудал дэгджээ.

Залилан мэхлэх замаар Америкийн иргэдийн эрүүл мэнд, байгаль орчин хамгаалах хууль, дүрэм журмыг ноцтой зөрчсөн гэж АНУ-ын Хууль зүйн яам үзсэн байна.

“Хино Моторс” компанийн Гүйцэтгэх захирал бөгөөд Ерөнхийлөгч Сатоши Огишо ийм асуудал үүсгэсэндээ үйлчлүүлэгчид болоод хөрөнгө оруулагчдад хүлцэл өчжээ.

“Дизельгейт” гэх энэ төрлийн асуудалд үүнээс өмнө Ауди, Порше, Шкода зэрэг нэртэй брэнд, Вольксваген ч мөн холбогдсон.

Асуудалтай автомашинуудаа эгүүлэн татаж, хэрэглэгчдэд нөхөн төлбөр олгоход Вольксваген 30 гаруй тэрбум ам.доллар зарцуулжээ.